matagal pang kitang tatawid sa guhit
upang iwasan ang nagbabantang ngitngit
ng Bathala sa lupa ng mga paslit
habang tinitingala pa rin ang langit
nagninilay-nilay sa gabing pusikit
at patuloy pa sa umagang sumapit
agila'y nag-aabang ng madadagit
dahil sa gutom, isang bata'y nang-umit
batid ko ang pagsasamantala't lupit
ng sistemang ang dulot sa madla'y gipit
manggagawa'y nagtatrabaho sa init
sa barberya'y kaymahal na rin ng gupit
kung maghihimagsik man ang maliliit
ay unawain anong nais makamit
karapata'y ipagtatanggol nang pilit
at panlipunang hustisya'y igigiit
luto'y di maganda, ang karne'y maganit
may di sapat ang timpla pagkat mapait
tulad ng karanasang di mo mawaglit
nang bata'y may tinapay muling pinuslit
- gregoriovbituinjr.
08.10.2021
Walang komento:
Mag-post ng isang Komento