Tula ang alay sa pakikibaka

TULA ANG ALAY SA PAKIKIBAKA
ni Dimas Ugat
15 pantig bawat taludtod

alay ko sa pakikibaka ang bawat kong tula
para sa pagbabago ng buhay ng kapwa dukha
sa karapatang pantao at uring manggagawa
bawat saknong ay para sa marangal na adhika

ngayong puno ng ligalig sa panahon ng bato
dapat lang durugin ang bawat pasimuno nito
sa isyung droga, dapat paslangin ang puno't dulo
habang di nililimot ang karapatang pantao

bawat hakbang, nilay, danas, at suri sa lipunan
tinatala't tinutula bawat isyu ng bayan
bagamat sa pamilya't pagsinta'y may tulang laan
kalakhan ng katha'y para sa buong sambayanan

sa muli, bawat tula ng pakikibaka'y alay
sa bawat pangarap ng masa't pagbabagong tunay
kaisa nyo ako sa bawat hirap, dusa't lumbay
at nawa'y makatulong ang tula hanggang tagumpay

Ang mga lumpen proletaryado

ANG MGA LUMPEN PROLETARYADO
ni Dimas Ugat
15 pantig bawat taludtod

nabubuhay sa ilalim ng bulok na lipunan
tinapal-tapal na barungbarong yaong tahanan
nabubuhay sa diskarte sa sentrong kalunsuran
subalit masakit sa mata ng pamahalaan

sila ang tinatawag na lumpen proletaryado
tinuringang walang pinag-aralan, magugulo
lulong sa sugal, droga, mabisyo, sakit ng ulo
kayrami nilang ipinanganak sa mundong ito

isang uri ng mga taong ugali'y magaspang
pagkat sa lipunang ito'y kailangang lumaban
pusakal, buriki, puta't pulubi sa lansangan
manginginom, nangingikil nang makakain lamang

durugista, kriminal, kahit ano'y papasukin
upang mga tiyan nila'y malagyan ng pagkain
walang pagkakataong ang dignidad nila'y dinggin
tingin ng marami'y daga ang tulad nilang lumpen

sila daw ang nasa mababang uring manggagawa
na kamalayang makauri'y di mauunawa
di makatulong sa rebolusyonaryong adhika
nabubuhay ng patapon ng di nila sinadya

kung maoorganisa ang lumpen proletaryado
may kakayahan kayang makatulong sa obrero
upang mapalitan ang sistemang kapitalismo
at bakasakaling maitayo ang sosyalismo

ngunit tanging sagot ko lamang sa ngayon ay ewan
paano matitiyak na sila'y di mang-iiwan
lalo na kapag umiigting ang mga labanan
o uring manggagawa ang tanging maaasahan

* ang salitang Aleman na lumpen o "basahan" sa kalaunan ay naging mga taong animo'y nakasuot ng basahan, at ginamit ito ni Marx sa kanyang akdang "Ang Ideyolohiyang Aleman".

Bawat martir ng kilusang paggawa

BAWAT MARTIR NG KILUSANG PAGGAWA
ni Dimas Ugat
11 pantig bawat taludtod

bawat martir ng kilusang paggawa
ay tunay na bayaning pinagpala
natatangi sila't kanilang diwa
sa kilusang ito'y nagpasimula
kahit burgesya’y labis ang paghanga
sa pagkakaisa ng manggagawa
dinanas nila'y mga halimbawa
kung paano ilaban ang adhika
kung paanong puno ng dusa't luha
ang pakikibaka laban sa sigwa
aral nila'y dapat ginugunita
ng mga aktibista't manggagawa
ipanalo ang lipunang malaya
para sa kinabukasan ng madla

Ang buhay ko'y sa kilusan na nakalaan

ANG BUHAY KO'Y SA KILUSAN NA NAKALAAN
ni Dimas Ugat
15 pantig bawat taludtod

ang iwing buhay ko'y sa kilusan na nakalaan
nasa kamay na nila ang buhay ko't kamatayan
pagkat ako'y aktibistang pagbabago'y adhika
nasa diwa'y paglilingkod sa uring manggagawa
tanging prinsipyong niyakap ang pinalalaganap
saanma't kailan upang matupad ang pangarap
na lipunang walang anumang pagsasamantala
ng tao sa tao't wala nang elit at burgesya
kilusan ang kapiling sa maghapon at magdamag
at sa pakikibaka'y nananatiling matatag
patuloy na sinusunod ang disiplinang bakal
ng kilusan bilang akda ng buhay na may dangal
sadyang dito na ako sa kilusan mamamatay
pagkat dito na nakalaan ang iwi kong buhay

Sosyalismo'y tulad ng karagatan

SOSYALISMO'Y TULAD NG KARAGATAN
ni Dimas Ugat
13 pantig bawat taludtod

iyang sosyalismo'y tulad ng karagatan
sadyang kaylawak, saklaw ang kailaliman
sa kanya'y walang nagmamay-aring sinuman
pagkat sa kanya, lahat ay nakikinabang

tulad ng karagatan iyang sosyalismo
dagat na hindi maari-ari ng tao
mayaman o dukha, para sa lahat ito
sa dagat ay nakikinabang lahat tayo

ganyan din ang sosyalismo, tulad ng dagat
walang nag-aaring negosyanteng makunat
isda, pusit, halamang-dagat, tubig-alat
walang nag-aaring kapitalistang bundat

dagat na ito'y di dapat isapribado
pagkat sadyang hindi maisasapribado
sinong mag-aari ng Dagat Pasipiko
kung nais pa niyang mabuhay pa sa mundo

tulad ng dagat na walang nagmamay-ari
dapat iwaksi ang pribadong pag-aari
pagkat pag-aring pribado'y mapang-aglahi
na sanhi kung bakit nagkaroon ng uri

tao'y makinabang sa yaman ng lipunan
wala para sa isang uri o iilan
lipulin ang naghaharing uri sa bayan
pribadong pag-aari'y iwaksing tuluyan

dapat isulong ang sistemang sosyalismo
pagkat walang paghahati ng tao rito
dapat itatag ang lipunang sosyalismo
upang maging ganap ang ating pagkatao

Wala akong kaibigan, ngunit maraming kasama

WALA AKONG KAIBIGAN, NGUNIT MARAMING KASAMA
ni Dimas Ugat
16 na pantig bawat taludtod

tulad ko'y walang totoong / kaibigan sa kilusan
ang meron lang ay kasama / na siyang aming tawagan
kaya kung may suliraning / dapat lutasing agaran
ako nga'y walang kakampi / na kapatid ang turingan
ang lahat tila'y kalaban / walang mapagsanggunian
walang matinong kausap / kani-kanya ng dahilan

pag mayroong kaguluhan / at matindi ang nangyari
ako'y walang makausap / sino ang aking kakampi
ano bang naganap? bakit? / nagtatanungan lang kami
parang di magkakasama / sa samahan at balwarte
sari-sariling palusot / wala silang nasasabi
ang disiplina ba'y ganyan / ganyan ba'y asal ng kadre

wala sa aking magtanggol / agad lalapit, bubulong
"may naninira sa iyo / pag-ingatan mo ang buhong"
may kalaban nga bang lihim? / na laging nagmamarunong
ngunit dahil wala akong / kaibigang makatulong
ako pala'y sinira na / ng kalabang nabuburyong
ngunit kung may kaibigan / sila'y agad magsusumbong

wala akong kaibigan / iyon na'y ating tanggapin
ngunit maraming kasamang / isa ang prinsipyong angkin
wala akong kaibigan / ngunit ako'y may layunin
tulad ng mga kasamang / iisa ang adhikain
walang kaibigang tunay / na masasabi kong akin
pagkat pawang kasama lang / ang sa bawat isa'y turing

marahil ganyang talaga / yaring buhay naming tibak
maaari tayong iwan / kung sila'y mapapahamak
disiplina ng Partido / itong tangi naming hawak
kung may nagawa kang mali / dapat parusahang tiyak
kung ang dangal mo'y may batik / ay gagapang ka sa lusak
kaya puri'y protektahan / tulad ng mga pinitak

wala akong kaibigan / bagamat may kolektibo
marami akong kasama / sa tinanganang prinsipyo
wala akong kaibigang / kaibigan ngang totoo
ngunit may kasama akong / dilag na kahit buhay ko
ay taos-puso kong alay / ngitian lang niya ako
na siyang tangi kong saya / sa pakikibakang ito

wala akong kaibigang / lagi kong nakakaramay
sa maraming suliraning / nakasusugat ngang tunay
ngunit maraming kasamang / laging aking kaagapay
sa mga pagkilos ngunit / hindi kasama sa lumbay
tanging sa adhikain lang / at prinsipyo magkaugnay
di talaga kaibigang / kasama hanggang mamatay

Walang himala't swerte sa rebolusyon

WALANG HIMALA'T SWERTE SA REBOLUSYON
ni Dimas Ugat
15 na pantig bawat taludtod

sa rebo'y di mapagpasya ang anumang himala
di rin dahil sa swerte kung tayo'y pinagpapala
rebo'y mananalo sa sama-sama nating gawa
di dahil sa himala't swerte'y nanalo ng kusa

dahil ang pagrerebo'y may syentipikong batayan
sinusuri natin ang kalagayan ng lipunan
anong sistemang nagdulot ng laksang kahirapan
kung bakit kayraming dukha, mayaman ay iilan

kung nais mong ang lipunan ay tuluyang magbago
huwag kang umasa sa swerte't himala, pare ko
kumilos ka, organisahin ang uring obrero
prinsipyo't tangan, ipalaganap ang sosyalismo

dumaan man tayo sa putik ng unos at baha
daanan man pati apoy ng pagsubok at banta
halina't pagkaisahin ang uring manggagawa
pagkat sila ang tunay na hukbong mapagpalaya

himala't swerte'y ibasura't kalimutan natin
diyalektikong materyalismo'y ating aralin
ang prinsipyong ito'y isapuso't ating angkinin
at sa bawat kusa't pagkilos ay ating gamitin

Katapatan sa bawat kasama

KATAPATAN SA BAWAT KASAMA
ni Dimas Ugat
15 pantig bawat taludtod

mahalaga ang katapatan sa bawat kasama
sa hirap man at ginhawa, sa pagdurusa't saya
hindi tatalikod sa prinsipyo't pagkakaisa
hanggang kamatayan, patuloy sa pakikibaka

ang bawat kasama'y kaisa sa diwa't prinsipyo
tangan yaong diwa ng pakikipagkapwa-tao
pawang magkasama sa adhikaing sosyalismo
magkatuwang sa mga pagkilos, rali't trabaho

katapatan sa prinsipyo, tapat din sa kasama
tapat din sa partidong kinabibilangan niya
iginagalang ang pagkatao ng bawat isa
higit pa sa magkakapatid ang turingan nila

walang lamangan, walang iwanan sa bawat laban
ang mali'y bakahin, ang wasto'y yakaping tuluyan
bawat isa'y ipagtanggol laban sa kasamaan
isapuso yaring prinsipyo't talagang Katwiran

mabuhay kayo, mga kasama't aming kapatid
di namin papayagang sa dilim kayo'y mabulid
magkasama tayo buhay man natin ay mapatid
sa pakikibaka, pagkat prinsipyo'y ating batid

Di dapat magsawa sa pakikibaka

DI DAPAT MAGSAWA SA PAKIKIBAKA

ni Dimas Ugat

15 pantig bawat taludtod

Prinsipyo ito ng walang sawang pakikibaka

Laban sa balakyot na kapitalistang sistema

Dugo, pawis, talino ang alay ng aktibista

Upang wakasan ang anumang pagsasamantala

Tuloy lang ang laban, huwag tayong manghihinawa

Tuloy ang pakikibaka at huwag manghihina

Patuloy na organisahin yaong manggagawa

Ang masa, at lahat ng dukha tungo sa paglaya

Pag-aralan at angkinin ang diwang sosyalismo

Parating ipagtanggol ang karapatang pantao

Di dapat magsawa sa pangarap na pagbabago

Wakasan ang sistemang bulok, rasismo, pasismo

Manggagawa, magkaisa, ang sistema'y baguhin

Daigdig na walang pang-aapi'y itayo natin!

Diyalektika, Hindi Pantasya

DIYALEKTIKA, HINDI PANTASYA

ni Dimas Ugat

13 pantig bawat taludtod

di tayo dapat mabuhay pa sa pantasya

na dulot ng kaisipang metapisika

sa kalagayan, pagsusuri'y mahalaga

pag-aralang mahigpit ang diyalektika

pagkat ito'y pundasyon ng materyalista

ang ideyalismo't metapisika'y kapos

wala tayong maaasahang manunubos

kundi kaligtasan nati'y nasa pagkilos

kung nais mong mapawi ang pagkabusabos

lipunan ay pag-aralan, magsuring lubos

kontradiksyon ay likas sa isang proseso

may kantidad at kalidad na pagbabago

kung talagang maunawaan natin ito

sa teorya't praktika'y patutunayan nito

sa totoong pagbabago'y dadako tayo

kongkretong kalagayan ay ating suriin

pagkakaisa't tunggalian ay alamin

ang nagpawi sa nagpawi'y isipin

diyalektikong materyalismo'y aralin

ito ang sa pakikibaka'y armas natin

Simbigat ng Bundok, Singgaan ng Balahibo

SIMBIGAT NG BUNDOK

SINGGAAN NG BALAHIBO

ni Dimas Ugat

14 pantig bawat taludtod

buhay ng isang aktibista'y may kabuluhan

kaysa isang pulos tubo ang nasa isipan

mabuting totoong maglingkod sa sambayanan

kaysa burgis, pasista't elitistang gahaman

ang maglingkod sa bayan ay simbigat ng bundok

pagkat ang binabago'y isang lipunang bulok

ibagsak ang mga nagpapasasa sa tuktok

at tanggalin ang mga nasa gobyerno'y bulok

yaong naglilingkod para sa kapitalismo

naglilingkod sa mapang-api't mga dorobo

kabuluhan nila'y singgaan ng balahibo

pagkat sa puso'y tubo, di pagkamakatao

pag-aralan natin at suriin ang lipunan

kongkretong suriin ang kongretong kalagayan

alamin kung bakit masa'y dapat paglingkuran

at dalhin sa katubusan nila't kalayaan

kaya pag ating kasama'y biglaang mamatay

sa laban o sakit, parangal yaong ibigay

pagkat sa pakikibaka'y kanya nang inalay

ang buong panahon, pawis, dugo niya't buhay

simbigat ng bundok, singgaan ng balahibo

magkaibang kamatayan ng dukha't dorobo

saludo tayo sa nagsakripisyong obrero

ngunit kapitalista'y dinuduraang todo

Di Natatapos sa Tula ang Pakikibaka

DI NATATAPOS SA TULA ANG PAKIKIBAKA

ni Dimas Ugat

14 pantig bawat taludtod

di natatapos sa tula ang pakikibaka

kundi patuloy ang proseso nito sa masa

kaya magpakasipag sa pag-oorganisa

ang masa'y imulat bakit bulok ang sistema

at bakit kailangang ito'y baguhin nila

magpatuloy man tayong humabi ng taludtod

dapat alam din natin kung papaano sumugod

umatras, umabante, makibaka, kumayod

pagkat di lang sa tula tayo dapat malugod

kundi aktwal na pagkilos ang totoong buod

bawat punglo'y talinghaga't talinghaga'y punglo

na tagos sa balat, katawan, sikmura, puso

taludtod at saknong tila'y busog at palaso

mga makata'y berdugo ng sakim sa tubo

habang ang bulok na sistema'y iginugupo

di natatapos sa tula ang pakikibaka

di matatapos ang tula ng pakikibaka

hangga't ang masa'y patuloy sa hirap at dusa

ngunit kung manggagawa't dukha'y magkakaisa

sila ang tatapos sa tula't pakikibaka

Ang Welga'y Isang Paaralan

ANG WELGA'Y ISANG PAARALAN

ni Dimas Ugat

14 pantig bawat taludtod

mahalagahin ang welga pagkat paaralan

hinggil sa tunggalian ng uri sa lipunan

welga'y kongkretong pagmumulat sa katangian

ng lipunan at estadong kinasasadlakan

ang welga'y paaralan upang magrebolusyon

nang makamtan ng obrero ang emansipasyon

at maresolba ang pangunahing kontradiksyon

sa pabrika, lipunan, at gamit sa produksyon

sa welga, ang mga manggagawa'y napapanday

sa pakikibaka pagkat tunggaliang tunay

kitang-kita kung bakit kapitalismo'y sablay

natututong dumiskarte hanggang magtagumpay

rebolusyon ay di lang sahod at benepisyo

at lalong higit pa sa isyu ng unyunismo

ito'y di lang katiyakan sa pagtatrabaho

kundi layon nito'y panlipunang pagbabago

Kung nais manalo sa pakikibaka

KUNG NAIS MANALO SA PAKIKIBAKA
ni Dimas Ugat
10 pantig bawat taludtod

organisahin ang manggagawa
pati magsasaka't maralita
ikalat ang sosyalistang diwa
at pagrebolusyonin ang madla

imumulat sa tamang prinsipyo
para sa tunay na pagbabago
ibabagsak ang kapitalismo
at isusulong ang sosyalismo

kung nais ng mga aktibista
na manalo sa pakikibaka
patuloy na magpo-propaganda
at magpapaliwanag sa masa

hinggil sa adhikang sosyalismo
na dapat nating maipanalo
misyong pagkaisahin ang tao
sa ilalim ng sistemang wasto

na wala nang magsasamantala
sa kapwa pagkat nagkakaisa
at nagmamahalan pa sa twina
kaya tayo'y may bagong umaga

'For a Cause' at hindi 'For a Cost'

'FOR A CAUSE' at hindi 'FOR A COST'

ni Dimas Ugat

13 pantig bawat taludtod

kami’y nakibaka di para sa salapi

kundi upang palayain namin ang uri

iligtas itong bayan sa pagkalugami

masa’y sagipin sa burgesyang naghahari

kami’y lumalaban pagka't ito'y 'for a cause'

upang masa'y lumaya sa pagkabusabos

ang aming pakikibaka'y hindi 'for a cost'

na tulad ng halimbawa ng trapong bastos

'for a cause' pagkat ang layunin ay dakila

sa bulok na sistema, masa’y mapalaya

dudurugin ang kapitalistang kuhila

itatayo ang lipunan ng manggagawa

yaong 'for a cost' ay kakampi ng burgesya

nakaluhod sa mga haring elitista

mga tuta ng buwayang kapitalista

at sinasamba’y yaong mapagsamantala

naniniwala kaming uring manggagawa

ang dito sa mundo'y dapat nang mamahala

sila itong bumuhay sa mundo't lumikha

silang may angkin ng bisig na mapagpala

kapangyarihan ng kapitalista'y pilak

na sa bangko't gobyerno'y kanilang inimbak

sa dignidad ng tao, sila ang yumurak

nasa pedestal sila, masa’y nasa lusak

bisig yaong gamit nitong mga obrero

sa pang-araw-araw nilang pagtatrabaho

binubuhay nila ang bayan at gobyerno

ngunit sila pa'y api't kaybaba ng sweldo

'for a cost' mag-isip itong kapitalista

laging nasa isip ay tumubo ang pera

ngunit 'for a cause' kaming mga aktibista

kalayaan ng uri ang prinsipyong dala

pigang-piga na ang manggagawang hikahos

na lakas-paggawa'y laging binubusabos

manggagawa'y dapat nang mag-isip, kumilos

tunggalian ng uri’y sila ang tatapos

tanggalin na sa mapang-api't naghahari

ang pribilehiyong pribadong pag-aari

makibaka't itanghal ang dangal ng uri

at lipunan ng manggagawa'y ipagwagi

Ang tahimik na tibak

ANG TAHIMIK NA TIBAK
ni Dimas Ugat
12 pantig bawat taludtod

hindi lahat ng tibak ay nag-iingay
pag nasa lansangang ang rali ay panay
sa pakikibaka sila ay nagsisikhay
upang makamit ang asam na tagumpay

merong tibak na maingay sa kalsada
meron ding tahimik na nakikibaka
nag-iisip ng tamang estratehiya
pinagninilayan ang wastong taktika

kumikilos siyang kasama ang masa
laya ng masa't uri ang nais nila
paglaya mula sa pagsasamantala
sa sistemang pinairal ng burgesya

minsan kailangang tahimik ang tibak
upang maiwasan niyang mapahamak
upang maituwid ang sistemang lubak
upang ang masa'y di gumapang sa lusak

ang tibak na tahimik sa pagbabasa
ay nagpapakabihasa sa teorya
na armas niya sa pag-oorganisa
sa pagkilos at pagmumulat sa masa

tahimik na tibak ay handang mamatay
pagkat alam niyang handog niya'y buhay
isang paa niya'y naroon sa hukay
habang isa'y hinahakbang sa tagumpay

ang tibak na iyon tatahi-tahimik
ngunit siya pala'y kapara ng lintik
di magsasalita kahit na madikdik
ng mga kalaban mata ma'y tumirik

nakabibingi rin ang katahimikan
lalo't sa dami ng pinagdadaanang
hirap, sakripisyo't pakikipaglaban
upang baguhin ang bulok na lipunan

mag-isa man siya'y alam ang gagawin
upang maipatagos ang simulain
sa masang adhika niyang palayain
siyang mahusay tumupad sa tungkulin

sa tibak na ito'y isang pagpupugay
sa pakikibakang sakbibi ng lumbay
siya'y marespeto't talagang mahusay
ikinikilos ay para sa tagumpay

mananatili siyang maninindigan
siyang laging listo saanmang labanan
siyang taas-noo saanmang larangan
siyang taas-kamaong naninindigan

tibak bang ito'y tahimik ring lilisan?
sa mundong itong kanyang pinag-alayan
ng panahon, pawis, dugo at isipan
nang maitayo'y sosyalistang lipunan

Una kong pamamaalam

UNA KONG PAMAMAALAM
ni Dimas Ugat
20 pantig bawat taludtod

1
Malugod kong inihahandog sa sambayanan ang buhay ko’t bisig
Upang baguhin ang lipunan at sa sinuman ay di palulupig
Kalakip ang prinsipyong sa pagkakapantay ng lahat nasasalig
Kasama ng maraming aktibistang sariling dugo’y idinilig
Ito ako, mga kaibigan, kasama, pamilya, iniibig

2
Ako’y nalulugmok habang nakikitang ang bayan ay nagdurusa
Habang nagpapasasa sa yaman ang iilang trapo’t elitista
Magpapatuloy akong lingkod nyo sa larangan ng pakikibaka
Habang tangan-tangan ko sa puso’t diwa ang prinsipyong sosyalista
Ako’y handang mamatay sa paglaban sa uring mapagsamantala

3
Mamamatay akong nababanaag ko ang tagumpay ng obrero
Laban sa kasakiman nitong masibang sistemang kapitalismo
Mamamatay akong nakikibaka laban sa kayraming berdugo
Na nagpapayaman sa dugo’t pawis ng manggagawa’t dukhang tao
Aktibista akong lalaban hanggang dulo, lalabang taas-noo

4
Noong ako’y musmos pa’t bagong nagkakaisip, aking pinangarap
Na upang umunlad sa buhay na ito, ako’y sadyang magsisikap
Magsisipag ako sa trabaho’t babatahin ang lahat ng hirap
Ngunit habang lumalaki’y napagtanto kong kayraming mapagpanggap
Habang sanlaksa ang dukhang kahit konting ginhawa’y di maapuhap

5
Sa eskwelahan, pinag-aralan ko ang historya’t matematika
Pinag-aralan pati na agham, wika, panitikan, at iba pa
Natutunan kong nabibili ang edukasyon ng mga maykaya
Kaybaba ng sahod ng manggagawa, walang lupa ang magsasaka
Ang babae’y api, demolisyon sa dukha, habol ang manininda

6
Sa mura kong isipan noon, kayraming umuukilkil na tanong
Bakit kayrami ng dukha, at may iilang nagpapasasang buhong
Kaya sa paglaon, sa mga naghihirap, pinili kong tumulong
Laban sa kasakiman ng iilan na bayan na ang nilalamon
Sa kabulukan nila, ang sigaw ng pagbabago’y nagsilbing hamon

7
Sa sarili kong paraan, tumulong akong sa puso’y may ligaya
Hanggang sa kalaunan, ang lipunang ito’y pinag-aralan ko na
Sumama ako sa mga rali at naging ganap na aktibista
Pinasok ang paaralan, mga komunidad at mga pabrika
Sa puso’t diwa’y sigaw: babaguhin natin ang bulok na sistema

8
Nag-organisa’t nagsulat akong sa puso’y may namumuong galit
Sa sistema ng lipunang sa ating kapwa tao’y sadyang kaylupit
Napakaraming isyung laging ang tanong ko sa isipan ay bakit
Bakit tinanggal kayo sa pabrika, bakit ang lupa nyo’y inilit
Bakit nauso ang kontraktwalisasyon, bakit mundo’y pawang pasakit

9
Tiniis kong lahat kahit mawalay pa sa kinagisnang pamilya
Tiniis pati pagod, bugbog at pukpok sa gaya kong aktibista
Tiniis ang gutom, kawalang pera, basta’t makaugnay sa masa
Dahil ako’y aktibistang nakibaka upang kamtin ang hustisya
Para sa manggagawa’t dukha tungo sa pagbabago ng sistema

10
Halina’t pagsikapan nating itayo ang lipunang makatao
Gibain na natin ang mga dahilan ng kaapihan sa mundo
Pangunahing wawasakin ang relasyon sa pag-aaring pribado
At iaangat sa pedestal ang hukbong mapagpalayang obrero
Habang dinudurog ang mga labi ng sistemang kapitalismo

11
Pagpupugay sa lumilikha ng yaman, kayong uring manggagawa
Magkaisang tuluyan kayong ang taguri’y hukbong mapagpalaya
Magkabuklod kayong lagutin ang nakapulupot na tanikala
Magkapitbisig kayong durugin ang elitista’t burgesyang diwa
Pagkat nasa mga kamay nyo ang pag-asa ng masang kinawawa

12
Sa tunggaliang ito’y may mga magagapi’t may magtatagumpay
Ngunit kung sakali mang sa labanang ito’y tanghalin akong bangkay
Ako’y nakahanda na sa pagtigil sa mahaba kong paglalakbay
Pagkat natapos na rin sa wakas ang buhay kong sakbibi ng lumbay
Sa oras na iyon, panahon nang katawan kong pagal ay humimlay

13
Di na mahalaga kung mga tulad ko’y tuluyang malimutan na
Basta’t mabuhay pa rin ang pangarap nating sosyalismo sa masa
Kung sakaling mabuhay ako dahil sa tula ng pakikibaka
Ipinagpapasalamat ko itong labis sa mga nagbabasa
Na ako pala’y nakatulong magmulat kahit sa mundo’y wala na

14
Paalam, mga kasama, kapatid, kapamilya, at kaibigan
Mananatili akong sosyalista sa aking puso at isipan
Mamamatay akong aktibista, kahit na ako’y abang lilisan
Taas-kamao akong aalis nang walang bahid ng kahihiyan
Paalam, paalam, magpatuloy man ang mga rali sa lansangan

Aktibista kami, hindi pulubi

AKTIBISTA KAMI, HINDI PULUBI
ni Dimas Ugat
11 pantig bawat taludtod

aktibista kami, hindi pulubi
aktibistang sa bayan nagsisilbi
ngunit bakit kinakawawa kami
turing sa amin ay mistulang api

tinanggap namin ang buhay na kapos
upang ipaglaban ang masa't musmos
dumidiskarte kami ng panustos
ngunit hindi kami namamalimos

sapagkat kami'y mga aktibista
dahil sa prinsipyo'y nagsama-sama
naglilingkod kaming tapat sa masa
sama-sama kaming nakikibaka

aktibista't pulubi'y naghihirap
ngunit magkaiba sila nang ganap
isa'y bagong sistema ang pangarap
habang isa'y pawang limos ang hanap

aktibista kami, hindi pulubi
kahit kung minsan, nanghihingi kami
yaon naman ay hindi pansarili
kundi panggagastos sa mga rali

pagkat ang rali'y mahalagang porma
ng aming pagkilos, pakikibaka
bagong sistema ang inaanyaya
ng mga tulad naming aktibista

aktibistang para sa manggagawa
at hindi pulubing kinakawawa
aktibistang sosyalismo'y adhika
at hindi pulubing prinsipyo'y wala

aktibistang para sa sambayanan
at hindi pulubing niluluraan
aktibistang handa na sa paglaban
at hindi pulubing niyuyurakan

kung nais mong tumulong, tumulong ka
huwag ka nang magdalawang-isip pa
samahan kami sa pakikibaka
hanggang ganap na manalo ang masa

aktibista kami, hindi pulubi
prinsipyo nami'y di ipinagbibili
sa pakikibaka'y nariyan kami
handang ipagtanggol ang masang api

Diwang Mandirigma

DIWANG MANDIRIGMA
ni Dimas Ugat
13 pantig bawat taludtod

kaming aktibista'y may diwang mandirigma
nakahandang mamatay para sa adhika
isang paa'y nasa hukay, isa'y sa lupa
prinsipyo'y ilalaban hanggang sa tumanda

kaming aktibista'y tapat sa adhikain
hindi kami duwag sa aming simulain
ang bulok na sistema'y papalitan namin
ng sistemang pantay-pantay para sa atin

kung kamatayan ang aming kakaharapin
kami'y nakahanda nang ito'y sagupain
ang kaaway ng masa'y aming susugpuin
ang mapagsamantala'y aming bibiguin

sapagkat kaming aktibista'y mandirigma
matatag ang puso at palaban ang diwa
ang alab ng pakikibaka'y di huhupa
titigil lang kami pag nabaon sa lupa

ngunit habang buhay pa kami't humihinga
patuloy pa rin kami sa pakikibaka
kaming mandirigma'y talagang lalaban pa
tuloy kami hanggang mabago ang sistema

Walumpu't Dalawang Tauhan

WALUMPU'T DALAWANG TAUHAN
ni Dimas Ugat
13 pantig bawat taludtod

“I began revolution with 82 men. If I had to do it again, I do it with 10 or 15 and absolute faith. It does not matter how small you are if you have faith and plan of action.” - Fidel Castro

i.

"tanging walumpu't dalawang tauhan lamang
at sinimulan na namin ang himagsikan

kung rebolusyong ito'y uulitin ko pa
gagawin kahit na sampu o labinlima

kasama ang absolutong sampalataya
na ang bulok na lipunan ay magigiba

marami man o kaunti ang nagrerebo
ay maaari pa ring magtagumpay tayo

kung may sampalataya sa mga kasama
at may plano ng aksyon sa pakikibaka"

ii.

itong tinuran ni kasamang Fidel Castro
ay aral sa mga aktibistang tulad ko

paano bang baguhin ang lipunang bulok
ang lipunan muna'y dapat nating maarok

kaya aralin ang pasikut-sikot nito
upang mailapat natin ang tamang plano

ang bawat kasama'y dapat nagkakaisa
laging may tiwala sa kakayahan nila

walang iwanan hanggang maipanalo
ang ating rebolusyon tungong sosyalismo